Fevralın 6-da Ukrayna qüvvələrinin Rusiyanın Kursk vilayətində başlatdığı hərbi əməliyyatın altıncı ayı tamam oldu. 2024-cü ilin 6 avqust tarixində Ukrayna hərbi qüvvələri Kursk bölgəsinə hücum başlatmış, Sudja şəhəri daxil olmaqla geniş əraziləri ələ keçirmişdi.
Ukrayna prezidenti Volodimir Zelenski fevralın 6-sı gecə yayımladığı müraciətində bildirib ki, bu əməliyyat müharibəni Rusiyanın daxilinə daşıyıb.
"Rusiyanın ərazisində həyata keçirdiyimiz aktiv əməliyyatlarla müharibəni onların evinə gətirdik", –o əlavə edib.
Lakin prezident ölkənin qeyri-rəsmi hərbi bloqları və Rusiya Müdafiə Nazirliyinin (MN) əks-hücumla bağlı yaydığı məlumata heç bir şərh verməyib. Rusiya MN Ukrayna qüvvələrinin Kursk bölgəsindəki yeni əks-hücum cəhdlərinin uğursuz olduğunu və ağır itkilərə uğradığını vurğulayıb.
Ukrayna Kursk bölgəsindəki mövqeyini Rusiya ilə mümkün sülh danışıqlarında faydalı bir rıçaq kimi görür.
Zelenski fevralın 5-də X sosial şəbəkəsində etdiyi paylaşımda "Bir gün, müharibə diplomatik həllə doğru irəlilədikdə bu əməliyyatın nə qədər vacib olduğunu görəcəksiniz" deyə vurğulayıb.
Zelenskinin ofisi fevralın 6-da bildirib ki, Ukraynanın ələ keçirdiyi sərhəd bölgələrində yaşayan yüzlərlə rusiyalı mülki vətəndaşın Rusiyanın nəzarətindəki ərazilərə qayıtması üçün humanitar dəhliz açmağa hazırdır.