Baltikyanı ölkələr - Estoniya, Latviya və Litva sabah, fevralın 8-də Rusiya, Belarus və Rusiyanın Kalininqrad anklavını birləşdirən IPS/UPS elektrik ötürmə şəbəkəsindən ayrılacaq.
Fevralın 9-da bu üç ölkə qərbdə Portuqaliyadan şərqdə Ukrayna və Türkiyəyə qədər əksər Avropa ölkələrini əhatə edən Avropa qitəsinin sinxron şəbəkəsinə (UCTE) qoşulacaq.
Baltikyanı ölkələrin Rusiya ilə elektrik əlaqələrini kəsməsi həm geosiyasi, həm də simvolik baxımdan əhəmiyyət daşıyır. Bu proses Rusiya prezidenti Vladimir Putinin üç il əvvəl Ukraynaya qoşun yeritməsi və Moskvanın Aİ ilə münasibətlərinin kəskin pisləşməsindən sonra sürətlənib.
"Bu, Rusiyanın və Belarusun enerji sistemindən asılılığımızın son qalan elementindən fiziki cəhətdən ayrılmadır", – Litva prezidenti Qitanas Nauseda bir neçə gün əvvəl "The Associated Press"ə verdiyi müsahibədə bildirib.
Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi və Estoniyanın keçmiş baş naziri Kaya Kallas fevralın 7-də X sosial şəbəkəsindəki paylaşımında qeyd edib ki, Rusiya artıq bu ölkələri enerji ilə şantaj edə bilməyəcək: "Litva, Latviya və Estoniya sabah Rusiyanın elektrik şəbəkəsindən həmişəlik ayrılacaqlar. Rusiya artıq enerjidən şantaj vasitəsi kimi istifadə edə bilməz. Bu, azadlıq və Avropanın birliyinin qələbəsidir".
Baltikyanı ölkələr ilk dəfə 2007-ci ildə Avropanın enerji şəbəkəsinə qoşulmağa hazır olduqlarını bildiriblər və 2018-ci ildə rəsmi müraciət ediblər.